《小傳日記》四川(新聞 - 網站 - 圖片)大地震，祖國股市噚日（１３日）軟咗一日之後，今日（１４日）急急反彈，深滬Ａ股分別升近３％，香江呢邊，今日早段一陣震倉，但之後就跟隨外圍上移。 噚晚油魔又試破頂，缸友怕通脹壓力會好犀利，花旗魚缸腳仔軟軟，亞洲區今日初段扮無力，後尾卻紛紛玩倒升，東瀛就進帳１％，幾乎以全日高位收市。香江場上晝潛落２５１００邊線，但下晝喺外圍打氣下急急回升，散場微跌１９點收２５５３３，成交大收縮只得６７９億銀，係近一個月嘅低位。 ＊大象復平靜美撥備不足？地主果齊心誓要退高佬＊ 大象（００００５）行行企企略為低收，有缸友批評佢哋美國業務撥備不足。另一大隻佬中移動(新聞 - 網站 - 圖片)（００９４１）亦略收低唔夠半巴仙。 高佬話樓價短期難重拾升軌，對香江地產看法中性，但地主們大致有瞄頭，誓要打爛高佬隻眼鏡。長實(新聞 - 網站 - 圖片)（００００１）最快禮拜尾開價賣何文田「半山一號」，近排大好友（０００８３）火炭御龍山熱賣，位處傳統豪宅地區新盤理應更有看頭，個價下晝開車，成功倒升收半巴仙。傳言話新地（０００１６）兩位弟弟對大哥銷假復職有爭議，一切有待聽日（１５日）開會討論，個價走低半巴仙。另外，恆地（０００１２）同恆隆都靠穩，大好友揚２％。 紫籌噚日威完一輪，今日紛紛倒插，最傷係中遠太平洋(新聞 - 網站 - 圖片)（０１１９９），收市唔見３％。 ＊深滬急反彈國貨欲復勇，災後要重建重鋼先彈跳＊ 深滬Ａ場從大地震陰影中恢復過來，兩市各彈近３％；國貨場臨尾收復失地，散場微升２點收１３９８０。 災後重建概念激發鋼鐵份子潛能，馬鋼(新聞 - 網站 - 圖片)（００３２３）受外資簇擁保持強勢，續揚４％；重鋼（０１０５３）話生產經營無受地震影響維持正常，復賽追凸升幅，勁飊１８％，缸友話重鋼地理上靠近災區，他日重建的話可以近水樓台；鞍鋼（００３４７）則略收低；中國東方（００５８１）彈高１１％。 另邊廂，除重慶外，其他四川股亦紛紛彈起；成渝（００１０７）話公路冇受影響，升１１％，而民生物流（０８２１７）則升３％。 水泥份子同樣炒重建，海螺（００９１４）批盪Ａ貨籌集過百億人仔擴建產能，Ｈ場揚３％，Ａ場也進帳１％；中建材（０３３２３）亦進帳１％。 ＊三保續頭痕標普來打救，工行併永隆不惜出高價？＊ 地震天災令保險業好頭痕，實際要賠幾多分析師暫時仲係靠估，一般相信會多過上次雪災；但標普就話受災地區主要係農村，保險覆蓋比較差，賠付或者未必好多，「三保」今日各挫約半巴仙。 油魔繼續破頂之旅，上游油企笑呵呵，中海油(新聞 - 網站 - 圖片)（００８８３）逆流揚升３％，中信資源(新聞 - 網站 - 圖片)（０１２０５）進帳２％；中石油（００８５７）未來會多搞下游，媽咪亦同委內瑞拉(新聞 - 網站 - 圖片)於國內合建重量級煉廠，囝囝軟半巴仙；中石化（００３８６）滑２％。 「六行」噚日忽然炒起，但興奮過後今日回歸平靜，中行（０３９８８）研究下月初來香江發人債，漲１％。工行（０１３９８）略行高，江湖傳出佢哋快落實入股太平保險，而對併購永隆（０００９６）係志在必得，不惜出高價力爭。永隆再次變身皇帝女，今日破頂式高收近３％。 ＊瑞銀薦青啤舉杯齊飲勝，ＴＶＢ停賽賣盤有眉目？＊ 藍籌新貴中鋁（０２６００）同騰訊(新聞 - 網站 - 圖片)（００７００）仍有捧場客追貨，各漲３％。 瑞士(新聞 - 網站 - 圖片)錢莊第一次品評青啤（００１６８），仲呼籲買入Ｈ貨，話佢多品牌策略行得啱，毛利率可望增加，急彈６％，真係嗒得杯落。 缸湖流傳ＴＶＢ（００５１１）主席邵逸夫出讓持股，今日掃高１１％後停賽，而邵氏（０００８０）彈高１１％後，亦於下晝掛起免戰牌。 股仔場成為短線搵食場所，缸湖傳言中澱（０３８３８）於東北收購澱粉廠，短期可望落實，飊起２１％；能源類細股屢獲捧場，創新（００７０２）彈１６％，風電（００１８２）揚７％。另外，近排萊福（００９０１）、南興（００９８６）鑊氣鼎盛，分別掃起３３％同２３％。 ＊股仔場異動萊福升得誇，人間總有情齊慷慨捐輸＊ 八吓其他料，薪常會建議今年高、中、低級公務員加薪分別為６﹒９％、５﹒８％同４﹒４７％，喺扣除增薪點後，加幅分別係６﹒３％、５﹒２９％同３﹒９％。 四川大地震，血濃於水，各界都慷慨捐輸。民政部話，至今收已經到四川地震捐款１２億銀人民幣。直至噚日，港澳台地區嘅捐贈達到４億幾銀，包括香港政府嘅賑災撥款。而香港嘅民間捐款就有６千幾萬銀。多間企業同演藝界人士亦為災區捐款捐物資。 港鐵（０００６６）今日捐出１００萬賑濟災民，又喺旗下嘅商場放置捐款箱。獅子銀行亦捐出１０００萬。一於有錢出錢，有力出力。請請！ 《編者按》本欄搜羅即日熱門傳聞，惟消息未經證實，《經濟通》亦不保證內容之準確性 本文只供參考之用，並不構成要約、招攬或邀請、誘使、任何不論種類或形式之 申述或訂立任何建議及推薦，讀者務請運用個人獨立思考能力自行作出投資決定 ，如因相關建議招致損失，概與《經濟通》、編者及作者無涉。  寄給朋友 |
||||||||